नेप्सेमा नबिल र गरिमा विकास बैंकको शेयरमूल्य समायोजन: नबिलको ५३९ र गरिमाको ४१४ रुपैयाँ कायम

काठमाडौं। नेपाल स्टक एक्सचेञ्ज (नेप्से) मा बुधबार दुई वाणिज्य तथा विकास बैंकको शेयरमूल्य समायोजन भएको छ। नबिल बैंक र गरिमा विकास बैंकले आगामी साधारणसभा तथा लाभांश वितरण प्रयोजनका लागि बुकक्लोज गरेसँगै नेप्सेले बोनस शेयरका आधारमा नयाँ मूल्य निर्धारण (समायोजन) गरेको हो।

नेप्सेका अनुसार नबिल बैंकको ५ प्रतिशत बोनस शेयरका आधारमा मूल्य समायोजन गरी नयाँ शेयरमूल्य प्रतिकित्ता ५३९ रुपैयाँ ५ पैसा कायम गरिएको छ। त्यसैगरी, गरिमा विकास बैंकको १० प्रतिशत बोनस शेयरका आधारमा मूल्य समायोजन हुँदा समायोजित शेयरमूल्य प्रतिकित्ता ४१४ रुपैयाँ ५५ पैसा कायम भएको छ।

दुवै बैंकको मूल्य समायोजन मङ्गलवारको अन्तिम कारोबार मूल्यलाई आधार मानेर गरिएको हो। मङ्गलवार दोस्रो बजारमा नबिल बैंकको शेयर प्रतिकित्ता ५६६ रुपैयाँ र गरिमा विकास बैंकको शेयर ४५६ रुपैयाँमा अन्तिम कारोबार भएको थियो। अब बुधबार दोस्रो बजार खुल्दा दुवै बैंकको शेयर कारोबार यही समायोजित मूल्यलाई आधार मानेर सुरु हुनेछ।