सुनचाँदीको मूल्यमा लगातार गिरावट: सुन १,५०० र चाँदी ३० रुपैयाँले घट्यो

काठमाडौं। नेपाली बजारमा शुक्रबार (असोज ९ गते) सुन र चाँदी दुवैको मूल्यमा गिरावट आएको छ। बिहीबार तोलामा ३ हजार २०० रुपैयाँले ओरालो लागेको सुनको मूल्य शुक्रबार पुनः १ हजार ५०० रुपैयाँले घटेको हो।

नेपाल सुनचाँदी व्यवसायी महासङ्घका अनुसार यो गिरावटसँगै शुक्रबार छापावाल सुनको मूल्य प्रतितोला २ लाख ९८ हजार ६०० रुपैयाँमा झरेको छ। यसअघि बिहीबार सुन प्रतितोला २ लाख ९९ हजार १०० रुपैयाँमा कारोबार भएको थियो।

यस साताको अन्य दिनको कारोबारलाई हेर्दा बुधबार सुनको मूल्य १०० रुपैयाँले बढेर प्रतितोला ३ लाख २ हजार ३०० रुपैयाँ पुगेको थियो। मङ्गलबार भने १ हजार ७०० रुपैयाँले घटेर ३ लाख २ हजार २०० रुपैयाँमा सीमित भएको थियो।

त्यस्तै, सोमबार १ हजार ३०० रुपैयाँ घटेर ३ लाख ३ हजार ९०० रुपैयाँ कायम भएको सुनको मूल्य आइतबार भने २ हजार १०० रुपैयाँले बढेर ३ लाख ५ हजार २०० रुपैयाँ पुगेको थियो।

सुनसँगै शुक्रबार चाँदीको मूल्यमा पनि गिरावट दर्ता भएको छ। महासङ्घका अनुसार चाँदीको मूल्य तोलामा ३० रुपैयाँले घटेर ४ हजार ६२० रुपैयाँमा झरेको छ। बिहीबार चाँदीको मूल्य १६५ रुपैयाँले घटेर प्रतितोला ४ हजार ६५० रुपैयाँमा कारोबार भएको थियो।

यसअघि बुधबार चाँदीको मूल्य ४० रुपैयाँले बढेर ४ हजार ८१५ रुपैयाँ पुगेको थियो भने मङ्गलबार ३० रुपैयाँ घटेर ४ हजार ७७५ रुपैयाँ कायम भएको थियो। यस्तै, सोमबार १० रुपैयाँले बढेर ४ हजार ५ रुपैयाँ र आइतबार २० रुपैयाँले बढेर ४ हजार ७९५ रुपैयाँ पुगेको थियो।