संघीय संसद्का दुवै सदनको बैठक बस्दै: दर्जन विधेयक र वार्षिक प्रतिवेदनमाथि छलफल हुने

काठमाडौं।  संघीय संसद्अन्तर्गत प्रतिनिधिसभा र राष्ट्रियसभाको बैठक आज बस्दैछ।

सिंहदरबारस्थित संसद् भवनमा बिहान ११ बजे बस्ने प्रतिनिधिसभाको बैठकमा सभामा प्रस्तुत हुन नसकेका मौखिक तथा लिखित प्रश्नका उत्तरहरू सम्बन्धित मन्त्रीले टेबुल गर्ने सम्भावित कार्यसूची रहेको छ।

आजको बैठकमा प्रधानमन्त्रीका तर्फबाट ‘राष्ट्रिय प्राकृतिक स्रोत तथा वित्त आयोगको आठौं वार्षिक प्रतिवेदन, २०८३’ पेस गर्ने कार्यक्रम छ।

यस्तै, कानुन, न्याय तथा संसदीय मामिला मन्त्रालयका तर्फबाट ‘केही नेपाल ऐनको व्यवस्था जगाउने विधेयक, २०८३’ र ‘राष्ट्रिय प्रतिरक्षा विश्वविद्यालय विधेयक, २०८३’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत हुनेछ।

भौतिक पूर्वाधार तथा यातायात मन्त्रालयका तर्फबाट ‘फोहरमैला व्यवस्थापन विधेयक, २०८३’ लाई दफावार छलफलका लागि सम्बन्धित समितिमा पठाउने प्रस्ताव पेस गरिनेछ।

त्यसैगरी, महिला, बालबालिका तथा ज्येष्ठ नागरिक मन्त्रालयका तर्फबाट ‘महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षासम्बन्धी केही नेपाल ऐन संशोधन गर्ने विधेयक, २०८३’ लाई दफावार छलफलका लागि समितिमा पठाउने प्रस्ताव प्रस्तुत हुने कार्यक्रम छ।

स्वास्थ्य तथा जनसङ्ख्या मन्त्रालयका तर्फबाट आजको बैठकमा बहुप्रतीक्षित विधेयकहरू- ‘आमाको दूधलाई प्रतिस्थापन गर्ने वस्तु (बिक्री वितरण नियन्त्रण) (पहिलो संशोधन) विधेयक, २०८३’, ‘सुरक्षित मातृत्व तथा प्रजनन स्वास्थ्य अधिकार (पहिलो संशोधन) विधेयक, २०८३’, ‘स्वास्थ्यकर्मी तथा स्वास्थ्य संस्थाको सुरक्षासम्बन्धी (दोस्रो संशोधन) विधेयक, २०८३’ र ‘रामराजाप्रसाद सिंह स्वास्थ्य विज्ञान प्रतिष्ठान विधेयक, २०८३’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव पेस गरिनेछ।

आजैको प्रतिनिधिसभा बैठकमा ‘संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी (पहिलो संशोधन) विधेयक, २०८३’ पारित गर्ने कार्यसूचीसमेत रहेको छ।

बैठकमा सभामुखले प्रतिनिधिसभा नियमावली अनुसार निरन्तर १० वा सोभन्दा बढी बैठकमा अनुपस्थित रहेका सांसदहरूको सूचना स्वीकृतिका लागि पेस गर्नेछन् भने राष्ट्रपति कार्यालयबाट प्राप्त पत्रसमेत वाचन गरेर सुनाइनेछ।

राष्ट्रियसभाको बैठक

उता राष्ट्रियसभाको बैठक आजै अपराह्न १:१५ बजे बस्दैछ। राष्ट्रियसभामा पनि सभामा पेस हुन नसकेका मौखिक र लिखित प्रश्नहरूको उत्तर सम्बन्धित मन्त्रीहरूले टेबुल गर्ने कार्यसूची छ।

बैठकमा प्रतिनिधिसभाबाट संशोधनसहित फिर्ता आएको ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ माथि प्रतिनिधिसभाले गरेको संशोधनमा सहमति गरियोस् भन्ने प्रस्ताव पेस हुनेछ।

साथै, राष्ट्रियसभाको आजको बैठकबाट ‘आन्तरिक वायु सेवाको दायित्वसम्बन्धी विधेयक, २०८३’ पारित गर्ने कार्यसूची रहेको संसद् सचिवालयले जनाएको छ।