अत्यधिक तातो चिया वा कफी पिउँदा क्यान्सर हुन सक्ने जोखिम

बेलायतमा भएको अनुसन्धानले धेरै तातो चिया र कफीजस्ता पेय पदार्थहरू नियमित पिउँदा अन्ननलीको क्यान्सरको जोखिम बढ्न सक्ने देखाएको छ ।

अनुसन्धानकर्ताहरूले झन्डै १० लाख मानिसमा गरिएको यो अध्ययन यस क्षेत्रमा अहिलेसम्मकै सबैभन्दा ठूलो भएको बताएका बीबीसीले जनाएको छ ।

मनतातो चिया वा कफी पिउनेहरूको तुलनामा अत्यधिक तातो पेय पदार्थ पिउनेहरूमा क्यान्सरको जोखिम झन्डै तीन गुणा धेरै रहेको अध्ययनले पत्ता लगाएको छ । यद्यपि विशेषज्ञहरूले यस प्रकारको क्यान्सर हुने सम्भावना निकै कम हुने कुरामा जोड दिएका छन् ।

अत्यधिक तातो तरल पदार्थले पेटसम्म जाने अन्ननलीको भित्री तहका कोषहरूलाई क्षति पुर्‍याउन सक्छ ।

अक्सफोर्ड विश्वविद्यालयको यो अनुसन्धान ‘इन्टरनेशनल जर्नल अफ क्यान्सर’ मा प्रकाशित भएको छ । अनुसन्धानले ६५ डिग्री सेल्सियस वा त्योभन्दा धेरै तापक्रम भएको कुनै पनि तरल पदार्थलाई अत्यधिक तातो र सम्भावित रूपमा हानिकारक भनी वर्गीकरण गर्छ ।

९ लाख ७७ हजार २८२ जना मध्य–उमेर समूहका पुरुष तथा महिलासम्बन्धी तथ्याङ्कअनुसार दैनिक ६ वा त्योभन्दा धेरै तातो पेय पदार्थ पिउँदा पनि जोखिम बढाउँछ ।

दूध मिसाउँदा पेय पदार्थ अलिकति चिसो हुन सक्ने भए पनि यसलाई पिउनुअघि अझ चिसो हुन दिन सकिने अनुसन्धानकर्ताहरू बताउँछन् ।

कितलीमा पानी पूर्णरूपमा उम्लिसकेपछि तुरुन्तै तयार पारिएको चियाको तापक्रम झन्डै १०० डिग्री सेल्सियस—अर्थात् पानीको उम्लने विन्दु—हुन्छ । यसलाई कपमा खन्याएपछि तापक्रम घटेर झन्डै ९० वा ९५ डिग्री सेल्सियसमा झर्छ ।

पेय पदार्थ सुरक्षित तापक्रममा नआउन्जेल केही मिनेट पर्खनुपर्ने अध्ययनले सुझाव दिएको छ ।

क्यान्सर रिसर्च युकेका अनुसार तातो पेय पदार्थलाई चिसो हुन ठ्याक्कै कति समय छोड्नुपर्छ भनी यकिनका साथ भन्न गाह्रो छ ।

अर्को एक अध्ययनमा ११८ जना युवाले विभिन्न प्रकारका कालो कफी पटक–पटक चाख्दा उनीहरूले तापक्रम ७० डिग्री सेल्सियस वा त्योभन्दा धेरै हुँदा मात्र धेरैजसोले त्यसलाई धेरै तातो मानेका थिए ।

अनुसन्धानकर्ताहरूका अनुसार यदि मानिसहरूले धेरै तातो पेय पदार्थ पिउन छोडे भने अन्ननलीको क्यान्सरका प्रत्येक १० मध्ये झन्डै १ वा २ वटा घटना रोक्न सकिन्छ ।