मातृ तथा नवजात धनुष्टंकार उन्मूलन कायम राखेकोमा नेपाललाई डब्ल्यूएचओको सम्मान

काठमाडौं। विश्व स्वास्थ्य संगठन (डब्ल्यूएचओ) ले नेपाललाई मातृ तथा नवजात धनुष्टंकार  उन्मूलनको अवस्था निरन्तर एक दशकसम्म कायम राख्न सफल भएको भन्दै सम्मान गरेको छ।

तिमोर-लेस्तेको डिलीमा आयोजित डब्ल्यूएचओ दक्षिण-पूर्वी एसिया क्षेत्रीय समितिको ७९औँ बैठकमा सो सम्मान प्रदान गरिएको हो।

बैठकमा नेपालका तर्फबाट सहभागी तीन सदस्यीय प्रतिनिधिमण्डलको नेतृत्व गर्दै स्वास्थ्य सेवा विभागकी अतिरिक्त सचिव डा. संगीता कौशल मिश्राले उक्त सम्मान ग्रहण गरिन्।

बलियो राष्ट्रिय प्रतिबद्धता, गुणस्तरीय खोप सेवा र सुरक्षित प्रसूति अभ्यासका माध्यमबाट नेपालले हासिल गरेको यो उपलब्धिलाई कदर गर्दै डब्ल्यूएचओका महानिर्देशकले डा. मिश्रालाई सम्मानपत्र हस्तान्तरण गरेका हुन्।

सम्मानपत्रमा नेपालको सफलताले दक्षिण-पूर्वी एसिया क्षेत्रमा मातृ तथा नवजात धनुष्टंकार उन्मूलन कायम राख्ने सामूहिक अभियानमा महत्त्वपूर्ण योगदान पुर्‍याएको उल्लेख गरिएको छ।

यसैबिच, देशमा हालै आएको विनाशकारी बाढीपछिको स्वास्थ्य प्रतिकार्य र राहत कार्यमा प्रत्यक्ष खटिनुपरेकाले स्वास्थ्य तथा खाद्य स्वच्छता मन्त्री निशा मेहता बैठकमा प्रत्यक्ष सहभागी हुन सकिनन्।

उनले भिडियो सन्देशमार्फत नेपालको पछिल्लो बाढीको अवस्था र प्रभावित जनसमुदायको स्थितिबारे बैठकलाई जानकारी गराउँदै जलवायु न्याय तथा स्वास्थ्य क्षेत्रका लागि जलवायु वित्तको आवश्यकतामा जोड दिएकी छन्।