२० वर्षपछि इराकबाट अमेरिकी सेना फिर्ता हुँदै

अमेरिकाले इराकमा रहेको आफ्नो बाँकी सैन्य फौज फिर्ता गर्न लागेको छ ।

सेप्टेम्बर ३० अर्थात् आजका दिन अमेरिकाले इराकमा रहेको आफ्नो बाँकी सैन्य फौज फिर्ता गर्न लागेको हो ।

यससँगै सन् २००३ मा इराकमाथि आक्रमण शुरु गरेयता कायम रहेको अमेरिकी सैन्य उपस्थितिको अन्त्य हुने बीबीसीको खबरमा उल्लेख छ । सद्दाम हुसेनलाई सत्ताबाट हटाएपछि इराक लामो समयसम्म विद्रोह र साम्प्रदायिक हिंसामा फसेको थियो ।

त्यसपछि अमेरिकाले सन् २०११ मा आफ्ना फौज फिर्ता गरेको थियो । तर, इस्लामिक स्टेट आईएस विरुद्धको अभियानमा सहयोग गर्न सन् २०१४ मा अमेरिकी सेना फेरि इराक फर्किएको थियो ।

सन् २०२४ मा अमेरिका र इराकले आईएसविरुद्धको अमेरिकी नेतृत्वको गठबन्धन सैन्य अभियान अन्त्य गर्ने सहमति गरेका थिए । त्यसअनुसार अहिले अमेरिकी फौज फिर्ता भइरहेको हो ।

इराक युद्धको समयमा सन् २००७ मा इराकमा एक लाख ७० हजारभन्दा बढी अमेरिकी सैनिक तैनाथ थिए । सन् २०२३ को डिसेम्बरसम्म यो संख्या घटेर २ हजार ४ सयसम्म पुगेको थियो ।

अमेरिकी फौज फिर्ता भए पनि इराकमा अमेरिकाको राजनीतिक तथा सुरक्षा प्रभाव तत्काल समाप्त नहुने विश्लेषकहरूले बताएका छन् ।