ट्रम्पका छोराहरूले पाकिस्तानमा ड्रोन उत्पादन गर्ने

काठमाडौं । अमेरिकी राष्ट्रपति डोनाल्ड ट्रम्पका छोराहरूसँग जोडिएको पावरस कम्पनीले पाकिस्तानमा ड्रोन उत्पादन युनिट स्थापना गर्न गइरहेको छ। एरिक ट्रम्प र डोनाल्ड ट्रम्प जुनियरको लगानी रहेको कम्पनीका प्रतिनिधिहरूले पाकिस्तानी सेनाध्यक्ष असिम मुनिरसँग रावलपिन्डीस्थित सैनिक मुख्यालयमा गोप्य भेटवार्ता गरेका छन्।

पाकिस्तानमा ड्रोन उत्पादनका लागि हरिपुर, रावलपिन्डी र तक्षशिलामा तीन सम्भावित सैन्य स्थलहरू छनोट गरिएका छन्। यहाँ आत्मघाती (सुसाइड/कामिकाजे) ड्रोनहरू बनाइनेछ। सेप्टेम्बर १६ मा मुनिर र पावसरबिच ड्रोन आयात तथा संयुक्त उत्पादनसम्बन्धी समझदारी पत्रमा हस्ताक्षर भएको थियो।

स्रोतका अनुसार उत्पादन प्रक्रियामा पाकिस्तानी सेनाको औद्योगिक युनिट पनि सहभागी हुनेछ। उत्पादन युनिटको अन्तिम स्थल (साइट) चयन गर्नका लागि पाकिस्तानी अधिकारीहरू अक्टोबर १५ पछि अमेरिका जाने कार्यक्रम छ। पाकिस्तानले हाल चीन र टर्कीबाट ड्रोन खरिद गर्दै आएको छ। टर्कीले पनि पाकिस्तानमा ड्रोन उत्पादन गर्ने सम्झौता गरिसकेको छ।