२०औं एसियाली खेलकुद: महिला कबड्डीमा नेपाललाई कास्य, सेमिफाइनलमा भारतसँग पराजित

काठमाडौं। जापानको इची-नागोयामा जारी २०औँ एसियाली खेलकुद प्रतियोगिताअन्तर्गत महिला कबड्डीमा नेपालले कास्य पदक प्राप्त गरेको छ।

जापानको तोकाइ सिटिजन व्यायामशालामा शुक्रबार भएको सेमिफाइनल भिडन्तमा बलियो प्रतिद्वन्द्वी भारतसँग ४८-२४ अंकले पराजित भएसँगै नेपाल कास्य पदकमै सीमित बनेको हो।

प्रतिस्पर्धात्मक बनेको सेमिफाइनलको पहिलो हाफमा भारतले ३१-१७ अंकको अग्रता लिएको थियो। दोस्रो हाफमा पनि भारतले नेपालमाथि १७-७ अङ्कको वर्चस्व कायम राख्दै फाइनलको यात्रा तय गर्‍यो।

यसअघि सन् २०२३ मा चीनको हाङजाउमा सम्पन्न १९औं एसियाली खेलकुदमा पनि नेपाल सेमिफाइनलमा भारतसँग नै पराजित हुँदै कास्यमा चित्त बुझाउन बाध्य भएको थियो।

प्रतियोगिताको समूह चरणमा नेपालले थाइल्यान्ड र श्रीलङ्कालाई पराजित गर्दै सेमिफाइनलको यात्रा तय गरेको थियो भने चाइनिज ताइपेइसँग पराजित भएको थियो।

जारी २०औं एसियाली खेलकुदमा नेपालको यो दोस्रो पदक हो। यसअघि करातेतर्फ पुरुष कुमिते ८४ किलो तौल समूहमा नेपालका तेन्जिङ शेर्पाले कास्य पदक दिलाएका थिए।