अस्ट्रेलियन स्टार क्रिकेटर डेभिड वार्नर एनपीएलका लागि काठमाडौँ गोर्खाजमा अनुबन्धित

काठमाडौँ। अस्ट्रेलियाका चर्चित तथा दिग्गज ब्याटर डेभिड वार्नर तेस्रो संस्करणको नेपाल प्रिमियर लिग (एनपीएल) खेल्न नेपाल आउने भएका छन्। उनी एनपीएल टोली काठमाडौँ गोर्खाजसँग अनुबन्धित भएका हुन्।

काठमाडौँ गोर्खाजले सामाजिक सञ्जालमार्फत वार्नरलाई टोलीमा भित्र्याएको औपचारिक जानकारी सार्वजनिक गरेको छ। ३९ वर्षीय देब्रेहाते ओपनर वार्नर एनपीएलको इतिहासमै सहभागी हुने हालसम्मकै सबैभन्दा ठूला र प्रभावशाली अन्तर्राष्ट्रिय खेलाडी मानिएका छन्।

यसअघि अस्ट्रेलियन क्रिकेट संस्था ‘सिम स्ट्राइक’ ले वार्नर एनपीएल खेल्न नेपाल जान लागेको खबर पोस्ट गरेको थियो, जसमा स्वयं वार्नरले समेत प्रतिक्रियास्वरूप ‘लाइक’ गरेपछि उनको आगमनबारे चर्चा चुलिएको थियो। त्यसैगरी काठमाडौँ गोर्खाजले विभिन्न सङ्केतमार्फत वार्नरको आगमनतर्फ इशारा गर्दै आएको थियो।

अस्ट्रेलियाली राष्ट्रिय टोलीका लागि अत्यन्त सफल करियर बिताएका वार्नरले सन् २०१५ र २०२३ को ओडीआई विश्वकप, सन् २०२१ को टी-२० विश्वकप तथा सन् २०२३ को विश्व टेस्ट च्याम्पियनसिप उपाधि जित्न महत्त्वपूर्ण भूमिका निर्वाह गरेका छन्। उनी अस्ट्रेलियाका तर्फबाट खेलका तीनै फर्म्याट (टेस्ट, ओडीआई र टी-२०) मा शतक प्रहार गर्ने सीमित खेलाडीहरूको सूचीमा पर्दछन्।

अन्तर्राष्ट्रिय टी-२० क्रिकेटमा ११० खेल खेल्दै १ शतकसहित ३,२०० भन्दा बढी रन बनाएका वार्नरको समग्र टी-२० करियर अझ लोभलाग्दो छ। उनले ४३९ टी-२० खेलहरूमा १० शतक र ११८ अर्धशतकको मद्दतले १४ हजारभन्दा बढी रन जोडिसकेका छन्।