युएईलाई ४४ रनले हराउँदै दोश्रो पटक नेपाल एसीसी प्रिमियर कपको च्याम्पियन

काठमाडौं । यूएईविरुद्ध ४४ रनको जित निकाल्दै नेपाल एसीसी प्रिमियर कपको च्याम्पियन बनेको छ ।

यससँगै नेपाल एसीसी एसिया कपका लागि पनि छनोट भएको छ । नेपाल दोस्रोपटक एसिया कपमा पुगेको हो । यसअघि नेपाल सन् २०२३ च्याम्पियन बन्दै एसिया कपका लागि छानिएको थियो । शनिबार मलेसियाको बायोमास ओभलमा नेपालले प्रस्तुत गरेको ३१४ रनको लक्ष्य पछ्याएको यूएईले ४९.१ ओभरमा सबै विकेट गुमाएर २६९ रन बनायो ।

यूएईको राहुल चोपराले अविजित १०० रनको योगदान गरे । उनले १०५ बलमा चार छक्का तीन चौका प्रहार गरे । यसैगरी, सोेहेब खानले ५२, तनिश सुरीले ४२, कप्तान हरप्रीतसिंह भाटियाले ३३ र खुजैमा तानवीरले १५ रन बनाए । छैटौँ विकेटका लागि राहुल र सोहेबबीच ८७ रनको साझेदारी भएको थियो ।

नेपालका करण केसीले तीन, ललितनारायण राजवंशीले दुई तथा दीपेन्द्रसिंह ऐरी, रोहितकुमार पौडेल र गुल्सनकुमार झा, बसिर अहमद र कप्तान सन्दीप लामिछानले एक–एक विकेट लिए ।

त्यसअघि टस जितेर ब्याटिङ रोजेको नेपालले निर्धारित ५० ओभरमा ९ विकेट गुमाएर ३१३ रनको योगफल तयार पारेको थियो । नेपालका आसिफ शेखले सर्वाधिक १०२ रनको योगदान गरे । उनले १०६ बलमा आठ चौका र चार छक्का प्रहार गरे ।

यसैगरी, गुल्सनकुमार झाले ३८ बलमा चार छक्का र तीन चौकासहित ५२, अर्जुन कुमालले ४३, रोहितकुमार पौडेलले ४०, दीपेन्द्रसिंह ऐरीले १८, बसिर अहमदले अविजित १५ र इशान पाण्डेले १३ रन बनाए ।

पहिलो विकेटका लागि आसिफ र अर्जुनले ९७ रनको साझेदारी गर्दै नेपाललाई सानदार सुरुआत दिलाएका थिए । यूएईका इब्रार अहमदले चार, खुजैमा तनवीरले दुई तथा हैदर अली र आदिब उस्मानीले एक–एक विकेट लिए । एसिया कप अर्को वर्ष बंगलादेशमा हुँदैछ ।