एकै दिन उपत्यकामा ७९२ सवारीसाधनमाथि ट्राफिकको एक्सन, कुन कसुरमा कति परे?

काठमाडौं। काठमाडौं उपत्यकामा ट्राफिक नियम उल्लंघन गर्ने ७९२ वटा सवारीसाधन तथा चालकमाथि पछिल्लो २४ घण्टामा कारबाही गरिएको छ। काठमाडौं उपत्यका ट्राफिक प्रहरी महाशाखाले शनिबार बिहान ६ बजेसम्मको अद्यावधिक तथ्यांक सार्वजनिक गर्दै उक्त जानकारी दिएको हो।

प्रहरीका अनुसार मदिरा सेवन गरी सवारीसाधन चलाउने (मापसे) ९१ जना चालकलाई नियन्त्रणमा लिई कारबाही गरिएको छ।

यस्तै, उपत्यकाका विभिन्न स्थानमा राखिएका सिसिटिभी क्यामेराको निगरानीका आधारमा ४७ वटा, ट्राफिक लाइटको रातो बत्ती (रेड लाइट) उल्लंघन गर्ने ४६ वटा र तोकिएको भन्दा तीव्र गतिमा सवारी चलाउने १०७ वटा सवारीसाधन कारबाहीमा परेका छन्।

त्यसैगरी, नो हर्न क्षेत्रमा जथाभावी हर्न बजाउने ८, लेन अनुशासन पालना नगर्ने ६ र सवारीसाधनको यान्त्रिक अवस्था ठीक नराखी चलाइएका २८ वटा सवारीमाथि पनि कारबाही गरिएको ट्राफिक प्रहरीले जनाएको छ।

अन्य विभिन्न सवारी कसुरमा ४५९ वटा सवारीसाधनमाथि कारबाही गरिएको छ भने यस अवधिमा एकतर्फी (वन-वे) सडक नियम उल्लङ्घनतर्फ भने कुनै पनि सवारीसाधन कारबाहीमा नपरेको प्रहरीले जनाएको छ।